Inn og ut er like langt, men ikkje HMS

Sidan sist:

• Eg har vore ute med stavane att, både i løypa og i litteraturen. Vart ikkje blå på rompa, men blaut i augo.

• Vaktmeister Øyvind har fiksa føter under høgresida på sjeselongen vår att, etter 3 år på bikken (sjeselongen, altså, ikkje Øyvind).

• Eg har heilt på eiga hand skrudd 2 uhyre lange skruar inn i den spinkle veggen vår for oppheng til Ipaden som følgjer utstillinga i høve ungdoms-OL.

• Vi har hatt vårt første lesesirkelmøte! Ei eksklusiv, ueinsarta gruppe på 7 drakk kaffe, åt kjeks og planla framtida. Kjell Askildsen blir vår første gjest, saman med Thomas F.

• Eg har skrudd ut att 2 skrekkeleg lange skruar fordi det eg skrudde fast i dei vart montert att og bak.

• Vi har rydda vekk overskotstidsskrift.

• Eg har reinsa vasskokaren vår med sitronsyre fordi Torill nekta drikke vatnet og ønskte seg ny. Dette som eit uhyre effektivt sparetiltak. Torill skrytte fælt. Ho trudde eg hadde kjøpt ny.

• Vi er midt inne i ei kasseringsrunde både i barn- og vaksenhyllene. Det gjer like vondt kvar gong. Det kjennest ikkje godt etterpå heller.

• Eg har pakka kofferten og er meir enn klar for bibliotekfestivalen Granitol på Gjøvik. Eller; eg veit kvar eg finn kofferten eg skal pakke i. Trur eg.

• Vi har rydda i musikksamlinga, som for det meste står urøyvd i desse nedlastingstider. Ei heil krybbe vart frigjort, klar for nye oppdrag annan stad i biblioteket. Framleis litt usikkert kva, men det blir definitivt ikkje overnattingsplass for noko Jesusbarn eller andre nyfødde. Dei tilsette har dessverre bikka fruktbar alder.

• Eg har skrudd inn att dei to kjempelange skruane i dei frå før flisete skruhola i panelveggen. No er det ikkje att stjerne å skru i på nokon av dei. Dei blir sitjande der.

• Ein førsteklassing har stadfesta at det støtt luftar SÅ godt på biblioteket!

• Veslesyster mi har vorte offisiell europameister i huing. Som litteraturformidlar vaktar eg meg for å halde på med slik ekstremhuing, men pratar jamt og trutt heile tida. Det gjer forresten veslesyster mi òg.

• Eg har gøymt godt alle lange skruar. Dette som HMS-tiltak for panelveggane i gammelprestgarden.

Bloggar utan skrujern: Merete