To vise kvinner og ein visegut

Om større og helst mindre hendingar på Lom folkebibliotek.

tirsdag 4. august 2015

Madam Vildes dag som bibliotekar

"Gode Madam Knipe! Jeg har en åtteåring som ønsker å bli bibliotekar. Det liker jeg godt. Så da lurte hun på om det var mulig å få sommerjobb på et bibliotek." Denne førespurnaden droppa inn i innboksen min førre veke. Han kom frå mora til ei jente som hadde veldig lyst til å ha sommarjobb som bibliotekar, om det kunne gå an iallfall ein dag. Og det er klart; slike førespurnader er søt musikk i bibliotekarøyro. Ivrige bibliotekarspirer må vi gjødsle og stelle så godt med som over hovudet mogleg. Det var sjølvsagt ikkje nei i min munn. Den ivrige praktikanten heiter Vilde Vårdal. Ho er åtte år og kjem frå Vågå, og rett etter opningstid i dag, troppa ho opp i sin beste bibliotekarmondur med papegøyetrøye, cardigan og bibliotekarskjørt. Vilde kunne fortelja at ho har lyst til å bli bibliotekar, fordi ho er veldig glad i å lesa. Og i sommar hadde ho besøkt mormor som også har sitt eige, vesle bibliotek, og det var der at bibliotekardraumen hadde blitt sådd.


Og det var inga sak! Ho tok skrankevakta på strak arm, scanna inn, lånte ut, stempla og delte ut Sommar+Bok-armband i Vilden sky. Kom det foreldre med ungar på hennar eigen alder, kom ho med supre boktips både til bøker å lesa høgt frå og bøker som ungane kan lesa sjølve. Det var nok ikkje fritt for anna enn at nokre av dei på andre sida av skranken, også kunne tenkt seg sommarjobb som bibliotekar etter at dei såg Vilde i aksjon i dag.


Når det er sommartider og to av tre vise kvinner slangar seg i sol og regn i vekevis i strekk, har det lett for å hope seg opp på bakrommet. Vilde fekk heldigvis ordna opp i litt av kaoset. Ho tok seg av ein kartong nye bøker, hjelpte til med bokplast, Deweynummer og stempling. Vi går ikkje meir i detalj her. Det er ikkje alle bibloitekariske hemmelegeheiter vi deler her i verdsveven, veit de.

Etter ein skikkeleg bibliotekardugurd, skreiv Vilde liste med sine beste boktips og laga fin utstilling.  Da klokka tikka mot stengetid, var det att berre rydding av tralla som aldri blir tom for ein ivrig bibliotekar, noko også Vilde fekk erfare. Men kva gjer det når ein hoppar og trallar bøkene på plass? Det Vilde likte best av alt, var å hjelpe folk til å finne bøker. Dette lovar svært godt for framtida som formidlande bibliotekar og for framtida for folkebiblioteka. Vi ynskjer oss fleire Vilder som entusiastisk deler sine beste boktips i sektoren og gjerne dansar bøkene på plass. Arbeidsdagen vart avslutta som seg hør og bør med is til alle etter ein framifrå innsats i litteraturen si teneste. Og trur de ikkje at det dukka opp ein journalist i løpet av økta òg som intervjua Vilde om sommarjobben og bibliotekardraumen. Sjansene er store for at madam Vilde dukkar opp i fyrstkomande Fjuk'. Og båe madammane var skjønt einige om at det hadde vore ein veldig morosam og fin dag på jobben.



 Rita

Ingen kommentarer:

Legg inn en kommentar