Det er tida for tre ljos i kveld, for lengt, for håp og glede. |
Det er også tida for å ha kontorgolvet fullt med bokhaugar til kassering. Det er tida for å tenkje på hyllene som fortsatt står der stappfulle. Det er tida for å koma på jobben med seks nye bokøskjer frå innkjøpsordninga pent plassert framfor skranken og fem til i vente, kvitra pakkemannen. Nokon kjem, nokon går, i biblioteket som i livet elles. Det er tida for å lesa resten av debutromanane frå 2014. Det er tida for å planleggje og gå ut med tilbod om formidlingsturné med to vise kvinner og ein forfattar våren 2014. Det er tida for å kontakte forfattarar om dei vil vera med oss. Det er tida for å kontakte bibliotek om dei vil ha besøk av oss. Det er også tida for å utsetja dette til over nyttår.
Det er tida for å ikkje ha tid. |
Det er tida for gløgg og syrupsnipper og julesal på biblioteket. Det er tida for skulane til å rydde opp før jul og levere inn alle bokkasser dei har lånt. Det er sjølvsagt tida for morgonkaffi med tre hjelpsame vaktmeistrar som ordnar så det skin i kvar ei krå i bokheimen før jul. Det er tida for julekonsertar som fyller ein med så mykje indre jubel at det iblant renn over. Det er tida for å få nybarberte studentsøner heim til jul. Det er tida for å vera mor på ein stol i ein mørk kulturhussal der det er julespel. Det er tida for å bite seg i leppa og sjå i taket og knuge lommetørklet hardt i handa for han som har den eine replikken. Det er tida for kvite lommetørkle og varmraude hjarte. Det er tida for alt.
Rita
Ingen kommentarer:
Legg inn en kommentar