"Det her e boka mi"

"Ha`u lese denne bokje hær, du?" Ei blid maske glyttar forsiktig fram bak krimreolen vår og viftar varsamt med ei glinsande bok framom nasen. Eg vaknar opp av ein håplaus, intens konsentrasjon om det geniale, men såre innfløkte deweysystemet, og tenkjer at alle travalege oppgåver skulle vorte avbrote slik -av ei smitin dame som på stillferdig vis dreg meg inn i varmen og gjer verda medmenneskeleg leveleg att. Raskt lyt eg vedgå at "Nei, denna ha e kje lese, nei...", medan flimringa bak auglokka stumt avslører den uhorveleg lange rekkje krimgodisar eg ikkje har fått med meg.... Det blir messom feil å ymte frampå om alle dei flotte barne- og ungdomsbøkene eg har tråla gjennom dei siste åra, sjølv om det for meg er ein stor rikdom eg kan ause av i rette samanhangar.

Torø Barlund pendlar ein stubb til og frå jobb kvar dag, og har etter kvart vorte ein storforbrukar av lydbøker. I dag er det derimot ei papirutgåve ho svingar seg med ute blant hyllene våre : "Djevelfjellet" av Deon Meyer . Ein tidlegare frigjeringskjempar opplever å få sin eigen son myrda, og då mordarane slepp unna fengselet, legg Tobela ut på ei frykteleg hemnreise der han sjølv drep personar som er dømde eller sikta for overgrep mot born. Torø tykkjer denne boka skil seg ut mellom anna fordi ho skildrar eit for oss uvanleg miljø frå Afrika. Boka er godt skrive med overraskande og spanande moment, og lesaren blir godt kjend med den alkoholiserte etterforskaren Bennie Griessel og livet hans. Griessel er på sporet av mordaren då hans eiga dotter kjem opp i ein dramatisk situasjon. Dette er verkeleg ei bok ein trygt kan rekne med blant påskekrimmen. Og i påska skal også barne-og ungdomsbibliotekaren lesa minst ei "vaksen" krimbok...

Bloggar : barnlege Merete