To vise kvinner og ein visegut

Om større og helst mindre hendingar på Lom folkebibliotek.

tirsdag 12. januar 2010

Skapte er vi til å bera

Ja så er tida komen da - underteikna skal kaste seg ut i bloggverden! Og kaste er vel det rette ordet, for eg er ikkje heilt komfortabel med dette... Eg kunne bite av meg tonga da eg i eit svakt augeblikk i desember sa at etter nyttår skal eg au blogge. Mine to overvise har sett standarden altfor høgt for ei nesten-nyvis ei, noko som har gjort at eg har utsett debuten i det lengste. Og som kjent; til lenger ein ventar til verre er det.
Men, når eg tenkjer meg om har eg da alltids noko blogge om, t.d. har eg eit syn friskt i minne frå bakrommet her sist laurdag, nemleg to tallerknar med restar (NB: restar!) av vafler, syltetøy og wienerbrød! Tenk døkk attende til dagen før, nemleg fredagens blogg, som synte oss eit innbydande dandert bilde av ymse sunne matvarer. Jau da, her heldt intensjonen om eit sunnare liv på og smuldre opp før eg omtrent fekk slått på ljoset for dagen. Og som eg angra på at eg ikkje tok fram fotoapparatet og dokumenterte herlegheita for resten av vår store følgje-verden. Fredag hadde det altså vore ein aldri så liten sprekk i matinntaket her, som i ettertida viser at den andre-vise må laste på seg enda større bør for å få utbytte av treningsøktene sine. For å ikkje nemne sjefs-visa som tydelegvis hadde ete så mykje godsaker at ho ikkje kom på arbeid att før i dag, ein kan som kjent få magebesvær av for stort inntak av denslags.

I dag er vi heldigvis friske og raske att alle tre, klare for gamle og nye haugar med bøker, og ikkje minst for lånarane våre som endeleg tør ut att etter ei hard kuldeperiode. Vi har sjølvsagt merka at antallet lånarar har vore noko redusert medan kulden stod på som verst, så jammen er det godt når det livnar til att - både av menige lånarar og av skuleelevar. Rett triveleg er det!!

Da er det også bra at vi har nye bøker og by fram, slik at leselysten held seg sjølv om folket kan vere meire ute og på farten att. Ein del av dei nyaste bøkene er også lydbøker, gode gamle perler i ny drakt, som berre ligg og ventar på ein ny vår - gjerne i bilen, eller i ein bærbar cd-spelar - så kan ein både vere ute og lese bok samstundes!
Vi får stadig besøk av fleire lånarar som brukar mykje av arbeidstida til å kjøre store bilar over lange avstandar, fleire og fleire oppdagar kor fint det da er med lydbøker som tidsfordriv.
Av dei gamle perlene i ny drakt kan eg mellom anna nemne Juvikfolket og Ragnhild-trilogien av Olav Duun, Kristin-trilogien av Sigrid Undset, trilogien om folket på Bjørndal av Trygve Gulbranssen og serien om Julie av Anne Karin Elstad.

Da ynskjer eg lesarane og lånarane våre ein god ettermiddag med nokre vise setningar frå Arne Ruset;

å leve er ikkje alltid det lettaste som finst
ikkje alltid vakre roser
og fin musikk
men sidan no
dette orgelet står her
kan vi vel spele litt på det

Bloggar: audmjuke Aud

4 kommentarer:

  1. Detta klarde du utmerket Aud :-)) Gerd Mona

    SvarSlett
  2. Heilt enig! Dette fiksa du heilt prima, Aud!
    Vigdis

    SvarSlett
  3. Veldig flott! Moro å lese dine visdomsord!!:)

    SvarSlett