To vise kvinner og ein visegut

Om større og helst mindre hendingar på Lom folkebibliotek.

torsdag 30. april 2009

Opphøyrssal

Mange ivrige boklesarar og boksamlarar møtte opp på Garmo folkeboksamling i går kveld da vi arrangerete opphøyrssal. Det var kø langt ut i gangen da vi opna døra klokka fem og 20 kjøpelystne strøyma inn med det same. Vi var veldig glade for at så mange møtte opp, og det vart ein triveleg kveld med blide og tilfredse kundar og omtrent like blide og tilfredse seljarar. Dei som hadde is i magen og heldt ut til 18.30 kunne gjera dei verkeleg store bokkuppa iallefall når det gjalt mengde bøker, for da arrangerte vi hyllemetersal og selde bøker for 100 kr pr hylle! Det var einskilde som måtte ta bilen og køyre heilt inntil døra for å unngå altfor store fysiske belastningar attpå salet og somme angra nok på at dei ikkje hadde tatt med hengjaren også...

Prosessen fram mot denne kvelden har vore lang, og vi har brukt mange timar på å vurdere kva bøker vi skal ta med til Lom, kva bøker som er så slitne i Lom at dei må skiftast ut med dei penare brukte eksemplara i Garmo, kassere bøker i Lom for å få plass til bøkene frå Garmo og på å slette nærare 3000 bøker frå bibliotekkatalogen vår før vi endeleg kunne førebu salet og gå over bøkene på nytt og prise dei. Nå står det 15 store pappkartongar på magasinet med bøker som skal omregistrerast og inn i hyllene på hovudbiblioteket og i Garmo er det framleis att nokre hyllemeter til med bøker så vi er ikkje heilt i mål enda. Det er som de skjønar mykje arbeid med å leggje ned bibliotekfilialar, og eit tips til andre kommunar som går med nedleggjingsplaner er å vente med evt. reduksjonar av stillingsressursane til dette arbeidet er over!

I dag er vi letta og glade for at salet gjekk så bra og smertefritt, vi oppdaga ingen slåsskampar eller høglydt krangling om bøker bak reolane, så vi vonar at kjøparane også kom heim att tilfredse og har byrja og snekre seg fleire bokhyller.

Ingen kommentarer:

Legg inn en kommentar